Ramchhung hmun hrang hrangah milim suasam a hluar chhunzawm zel a, tukin khan Kerala Kannur-a hnam pa, Mahatma Gandhi-a lim suasam a ni a, Tamil Nadu-ah pawh BR Ambedkar-a lim rawnga theh a ni bawk. Puan tawh angin milim suasam hi thawhtanni atang khan Tripura-ah a intan a, BJP hnathawk thenkhatin Communist hruaitu, Vladimir Lenin-a lim an nawr chhiat hnuah, Tamil Nadu leh West Bengal-ah te party hruaitu hranghluite milim suasam a ni leh bawk a ni. Sorkar laipui chuan milim suasam hi na takin a lo sawisel tawh a, pawikhawihtute man chhuaka hrem ngei turin State sorkar-te pawh a lo hriattir tawh a ni. Kerala-a Gandhi lim suasam-tu hi police-te chuan an man tawh niin an sawi a, hemi bik hi chu politics thil kaihhnawih ni loa an hriat thu an sawi bawk a ni.
Chanchin Thar Ramchhungah milim suasam hluar chhunzawm zel
