Ram dan dinglai hnuaiah ruihhlo do chu YMA tih tur ni lo mah se, ruihhloin a tih buai te chhanchhuah an nih theih nan hma a la a ni tih Central YMA President Pu Vanlalruata’n a sawi. He thu hi vawiina Dawrpui Vengthar Branch YMA kum 50 tlin Golden Jubilee lawm tanna inkhawm YMA Indoor a neihah a sawi a, tunhnaiah kum tlinglo ruihhlo ching thar an pung tih sawiin, ruihhlo avanga an man zingah kumtling lo pawh an tel thin a, heng mite hian thla 3 thla 4 vel an lo tih tawh thu an sawi tlangpui a ni a ti. Pu Vanlalruata chuan veng leh khaw tinah ruihhlo ching thar an pung zel nia sawiin a do kawngah tan lak a ngai hle a ni a ti a, Mizo mipui an pung chak lo lutuk chu veiawm a tih thu a sawi a, kum khata nau pian belh zat leh kum tina mihring thi zat khaikhinin hmun thuma thena hmun khat vel mitthi an awm zel a, fa nei tam tura inzirtir uar a tul a ni a ti a. Hnam dang te zingah UT leh state hial dil an awm ta nia sawiin Mizo te thanharh a hun ta hle tih a sawi. Pu Vanlalruata chuan, thalai hnathawk lova awm mai mai an tam ta lutuk chu veiawm a tih thu a sawi a, YMA chu mifel awm khawmna a nih bik lo mah se, midangte rintlak a nih zel theih nan thianghlim taka a awm erawh a pawimawh tih a sawi. Inkhawm hi Jubilee Organising Chairman Pu Vanlalzuiliana’n a kaihruai a, Branch President Pu Lalchhuanmawia’n thu a sawi a bakah Jubilee Zaipawl leh mal zai ngaihthlak a ni a, hemi hmalam hian Jubilee Lungphun hawngin jubilee dar an vaw bawk a, thlalak phochhuahna Photo exhibition an buatsaih bakah zaninah Jubilee mei an det dawn a ni. Dawrpui Vengthar Branch YMA hi kum 1968 February ni 21 khan din a ni a, tundinhmunah member 2200 vel an awm a ni.
