Union Health Ministry chuan ram chhungah coronavirus kai mi 18,601 an awm tawh tih a sawi a, mi 590-in an thihpui tawh a, darkar 24 chhungin kai thar mi 1,336 an awm tih a sawi.
Kar kalta khan coronavirus kai enkawl dam kawngah India chuan hma a sawn hle a, hri kai zingah za zela 17.48 enkawl dam an ni tawh a, ni khatah damlo 705 an dam a ni. Tunkar Thawh\anni khan za zela 14.75 enkawl dam tawh an ni a, Pathianni khan za zela 14.19 enkawl dam tawh an ni bawk a, Inrinni khan zaa 13.85 enkawl dam tawh an ni bawk. A ni telin enkawl dam zat hi an pung zel a, tun dinhmunah mi 3,200 aia tam an dam tawh a ni.
Delhi-a Max hospital Saket Branch chuan plasma therapy an hman hmasak ber chu a hlawhtling tih an sawi a, kum 49 mi plasma therapy hmanga private damdawi ina enkawl chu a dam tawh a, ventilator an phawi tawh tih an sawi a ni.
Coronavirus kai ngah ber Maharashtra-ah chuan sorkarin malaria damdawi hydroxy-chloroquine hman phalna a pe a, an state chhung hmun \henkhatah he damdawi hi an hmang \an dawn a, Asia rama mi retheite chenna hmun lian ber Dharavi-ah pawh malaria damdawi hi an hmang dawn tih Maharashtra sorkar chuan a sawi.
Indian Council of Medical Research chuan West Bengal-a Covid-19 test-na hmanrua dik famkim tawk lo chu a thlak sak dawn tih a sawi. West Bengal-ah hian Covid-19 test-na hmanrua an dawn chu state sorkarin a dik tawk lo tih an sawi a, result fel hlel deuha a pek bakah enchhinna neih tur pawh a chak tawk thei lo tih a sawi a ni.
