Health Ministry sawi danin ram chhung hmun hrang hrang a\angin Covid-19 kai thar hi an dawn belh zel a, vawiin khan mi 35-in an kai tih finfiah leh a ni a. Heti hian ram chhunga kai finfiah tawh zat chu 258 an tling ta a ni.
Prime Minister Narendra Modi chuan nimin khan state tin Chief Minister te video call hmangin hri darh zel tur do nana ruahmanna a neih te a sawipui a ni.
State hrang hrang sorkar te chuan zirna in te, dawr lian, cinema hall te, gym leh swimming pool te an khar tawh a, Meghalaya khawpui Shillong-ah chuan tukin khan darkar 24 chhung Curfew puan a ni bawk.
Bar Council of India chuan Modi-a’n naktuk, Pathiannia Janata Curfew a puan chu an thlawp tih an tarlang a, mahni ina inkhung a, midang hnaih lo thei ang bera awm chu Covid-19 darh zel tur ven nana thil \ha ber a nih vangin Modi-a thutlukna siam chu mipuite pawhin zawm \heuh se an duh tih an tarlang a ni.
Covid-19 kai thar te hi Delhi, Karnataka, Punjab leh Maharastra ami te an ni a, Ladakh ah chuan mi pathumin an kai a, Zirtawpni bika kai thar hmuh chhuah hi 63 an tling a ni.
Maharastra ah 52 in kai tawhin a kai tamna ber State a ni a, State Health Minister Rajesh Tope chuan mipuite chu public transport hmang lo turin a chah a, dawr leh sorkar pisa te pawh khar a ni tawh a ni. Delhi bul Noida ah pawh mi pakhatin a kai tih finfiah leh a ni a, heti hian mi panga in an kai ta a, thuneitute chuan he mi pakhat chenna chhehvela chengte chu tukin zing dar 10 atanga Thawh\anni dar 7 thleng pawn chhuak lo turin an ti a ni.
India rama covid-19 kai hmuh chhuah tawh zat 258 zingah hian 39 te chu ramdangmi an ni a, an zinga 17 chu Italy mi an ni a, pathum chu philippines, pahnih chu UK leh Canada, Indonesia leh Singapore mi pakhat \heuh an ni.
Pathianni a\angin hapta khat chhung ramdang a\anga thlawhna lut leh chhuak reng reng tih tawp a ni dawn a, Air India chuan Rome-a India mi tangkhangte la chhuak turin Dreamliner thlawhna a tir dawn a ni.
Kerala ah chuan mi 40 aia tlem lovin covid-19 hi an kai tawh a, an zinga 7 chu ramdangmi an ni a, Delhi ah mi 26 in an kai tawh a, an zinga pakhat chu ramdangmi a ni a, Uttar Pradesh ah chuan mi 24 in an kai tawh a, ramdangmi pakhat a tel bawk.
Karnataka ah Covid-19 vanga enkawl mek 15 an awm a, Jammu and Kashmir-ah 4, Ladakh ah 13, Telangana ah 19, Rajasthan ah 17, leh Gujarat ah 7 in an kai tawh a ni. Haryana-ah pawh mi 17 in an kai a, an zinga 14 chu ramdangmi an ni a, Tamil Nadu, Andra Pradesh leh Uttarakhand ah te pathum \heuhin an kai a, West Bengal, Odisha leh Punjab ah te pahnih theuhin an kai a, Puducherry, Chhattisgarh leh Chandigarh ah te pakhat \heuh hmuh chhuah an ni tawh bawk a ni.
Ram chhunga coronavirus vanga thi zat chu mi 4 an nih laiin enkawl dam mi 23 an awm tawh bawk a ni.
