Rakhine-a buaina chhuah thar leh avangin Bangladesh-ah Rohingya Muslim nuai 1 chuang tlanchhe tawh

Myanmar rama Rakhine state-a Rohingya hel hovin police leh sipai hmun an beih hnua buaina chhuak thar leh avang khan Bangladesh lamah Rohingya Muslim 1,25,000 vel zet an tlanchhe tawh a, he thil thleng avang hian Myanmar ram hruaitu leh Foreign Minister, Aung San Suu Kyi-i chu Muslim tamna, Bangladesh, Indonesia leh Pakistan ram mipuiten tan la turin an nawr nasa hle a ni. Nimin khan Pi Suu Kyi-i leh Indonesia Foreign Minister, Retno Marsudi-i chuan Rakhine state-a Rohingya Muslim-te chunga thil thleng leh buaina tihtawp dan tur an sawi dun a, an inkawmnaah hian Myanmar sipai hotu, Min Aung Hliang pawh a tel ve nia hriat a ni. Pi Retno-i hian Myanmar sorkar thuneitute chu Rakhine-a tharum thawhna thleng mek tihtawp dan kawng ngaihtuah tura a duh thu leh, Rohingya Muslim-te hi tanpuina awmze nei leh chhenfakawm tak pek dan ngaihtuah se a duh thu a sawi a ni. Puan tawh angin, thla hlui ni 25-a Rohingya hel pawlten police post leh sipai hmunpui eng emaw zat an beih hnua buaina chhuak thar leh avang khan mi 400 vel an thi tawh a ni.