Rajya Sabha Member, Pu Ronald Sapa Tlau-in khawvel puma COVID 19 hrileng mek vanga hmarchhak miten nunphung leh hnam zia inan loh vanga tawngpawng huatna lam \awngkam chhia leh inthliarna an tawh chungchang Parliament \hutkhawmna, Zero Hour-a sawichhuah a dilna chu a takin tihlawhtling hman lo mah se, a dilna in awmzia thui tak neia thuneituten hma an la nghal chu lawmawm a tih thu a sawi.

Pu Ronald Sapa hian COVID-19 hrileng vanga hmarchhak mi hmun hrang hranga awm ten harsatna an tawh thu leh hei hi hnam inpumkhatna tichhe thei a nih avangin Parliament-ah auchhuahpui tumin Rajya Sabha Secretary General hnenah dilna a thlen tih a sawi a, vanduaithlak takin tun thla ni 23 khan Parliament \hutkhawm hi tihtawp a ngaih tak avangin ni 21 khan Rajya Sabha Chairman, Pu Venkaiah Naidu-a’n amah chu a office-ah kovin hetianga hmarchhak mite enhranna hi a thleng tih an hriat loh thu a hrilh a. ‘Zero Hour’-a thusawina hun a awm tawh bawk si loh avangin Union Home Secretary bia-in thil awmdan zawng zawng leh a \ul anga hmala tura a lo hrilh tawh thu bakah Delhi Lieutenant Governor leh Chief Secretary te pawh a lo biak tur thu a hrilh a, an inbiak a\anga ni thum thlenga hmalakna a awm lo a nih chuan hriattir tur leh chak taka hma lak lak zui tur a nih thu a hrilh tih a sawi. Pu Ronald Sapa chuan, hetianga a ngenna ngaipawimawh Vice President, Rajya Sabha Chairman, Pu Venkaiah Naidu-a’n a bawhzui chu a lawm hle tih sawiin, tun hnuah chi leh hnam hrang inthliarna hi thleng tawh lo se a duh hle tih a sawi.