April ni 26 khan an nupa-a motorcycle-a an inphurh laiin pawngsualtute hian bike 2-a chuangin an tiding a, hruai hrangin a pasal hi an sawisa a, a hmuhlaiin a nupui hi an pawngsual a, pawikhawihtute zing a mi Mukesh Gurjar chuan a mobile phone hmangin thlalak a la bawk a, police hnenah thubuai thehlut tura an kal hnuah pawh video thlalak thehdarha vauin pawisa an la dil a ni.
Pawngsual tawktu pasal hian April ni 30-ah police te hnenah a thlen a, police te hian inthlan chhuanlamin FIR hi May ni 7-ah an ziaklut chauh tih a sawi a, pawikhawihna video thlalak hi thehdarh a nih avangin mipuite thinrimin lungawilohna an lantir nasa a, police te chet dan hian mipuite a ti thinrim leh zual a ni. police te hian pawikhawihtu 6, Indra Raj Gurjar, Mahesh Gurjar, Ashok Gurjar, Hansraj Gurjar, Chhote Lal Gurjar leh Mukesh Gurjar te chu man an nih tawh thu sawi mahse an chet muan avangin mipuite chuan hremna pek phutin lungawilohna an lantir a ni.
National Commission for Scheduled Castes vice chairman L Murgan chuan ni 15 chhungin heng police te hi SC/ST Act, section 4 hnuaiah man a phut tih sawiin thubuai hi nitin an endik a ni ang a ti a, Thawhlehni khan Rajasthan sorkar chuan Alwar police hotu Rajiv Pachar chu a sawn a, he thil lo dawngsawngtu police station-a thuneitu officer Sardar Singh chu ban lailawk nghal a nih bakah police dang 4 chu suspend an ni. Murgan chuan pawikhawihna tuartu chu women and child development department a\angin cheng 50,000 bakah zangnadawmnan cheng nuai 4 pek a nih thu a sawi.
