Kum 48 mi Nirav Modi hi thawmhnaw man to tak inbelin West End-ah hmuh a ni a, British chanchinbumite’n engemaw chen zuiin zawhna an zawt a, chhan erawh a chhang lo a, chanchinbumite hian West End-ah Nirav Modi hian lunghlu hmanga sumdawnna thar a din niin an sawi a ni.
Puan tawh angin Nirav Modi leh a putea Mehul Choksi te chu Punjab National Bank kaltlanga ram pawn lam a\anga sum lalutah leh dan loa pawisa puktir chungchangah man tura tih an ni a, CBI ten thubuai an thehluh theih hmain an pahnih hian ram an chhuahsan hman a, Mehul Choksi hi Antigua and Barbuda ramah khua leh tui nihna neiin a awm mek a, a hrisel \hat loh bakah mipui te’n an chim hlum a hlau ni sawiin India ramah a let leh ngam tawh rih loh thu a lo sawi tawh a, nikum December khan Nirav Modi-a ukil pawhin he thubuaiah hian mawhphurtu ber nia an puh avangin dan lo anga tihhlum mai a nih a hlauh thu Mumbai Court a lo hrilh tawh a ni.
Foreign Ministry thupuangtu Raveesh Kumar chuan Nirav Modi hi UK-ah a awm tih an hriat chian tawh thu leh tun dinhmunah chuan rorelna hmachhawn tura hruai kir ngawt theih a la nih rih loh thu a sawi a, dan angin UK sorkar hnenah Nirav Modi hian an ram chhuahsan tura thu pe turin an dil tawh thu a sawi bawk a ni.
