Pulwama inbeihnaa mawhphurtu bera ngaih, Jaish-e-Mohammed mi firfiak pawl hruaitu, Masood Azhar chu Pakistan ram chhungah a awm ngei tih an ram Foreign Minister Shah Mahmood Quershi-a’n a sawi.

CNN-in a kawmnaah Quershi hian Masood Azhar chu a hriselna a \hat loh nasat thu leh hei vang hian a chenna in pawh a chhuahsan thei lo niin a sawi a, hei bak hi thil dang hriat a neih loh thu a sawi bawk a, tun thlenga Masood Azhar man a nih loh chhan chu puh a nihna te hi India zawkin a finfiah theih loh vang niin a sawi leh a, India hian Pakistan Court-te hminna tur khawp finfiahna a neih chuan dan anga hma lak zel an hnial loh thu a sawi bawk a ni. Puan tawh angin Masood Azhar hi kum 2001-a India Parliament beihna leh kum 2016-a Pathankot Air Force Base leh kum 2016 veka Kashmir Uri-a inbeihna thlengah te khan mawhphurtu bera ngaih a ni a, kumin February ni 14-a Pulwama-a CRPF 40 thihna thihchilh bomb puakah pawh khan mawhphurtu bera ngaih a ni a, India sorkar chuan vawi eng emaw zat UN-in mi firfiak a hrek zinga telh tir a lo tum tawh \hin a, hei hi China chuan a dodal char char a ni.