February ni 14-a Jaish-e-Mohammad mifirfiakte’n thih chilh bomb hmanga Central Reserve Police Force mi 40 zet an thah vangin India ram chhung khawpui hrang hrangah mipui pungkhawmin an khua-a Kashmir mi te an tibuai nasa hle a, a bik takin Kashmir zirlaite’n harsatna an tawk nasa a, tihduhdah an nihlai video te pawh a darh nasa hle a, heng video te hi UK-a pawl Khalsa Aid te’n an hmuhin heng Kashmir mi te \anpui turin hma an la ta a, Jammu and Kashmir Students’ Organisation thupuangtu Nasir Khuehami chuan Khalsa Aid te hian Twitter hmanga amah an biakpawh thu sawiin, Dehradun leh Ambala a\angin Kashmir zirlaite hawna tur bus an buatsaihsak tih a sawi. Hei bakah hian Sikh pawl te’n Kashmir zirlaite awmna hostel te an veng lai video te hmuhtur a awm bawk a. India-a Khalsa Aid hotu Gurpreet Singh chuan Kashmir zirlai 300 chuang Chandigarh leh Jammu-a an thawn haw thu a sawi a, heng zirlai harsatna tawkte hi Dehradun leh Haryana mi an ni tlangpui tih a sawi a, Sikh pawl dang leh gurudwara committee te pawhin harsatna tawkte hi an \anpui a, gurudwara-ah te eitur leh riahna tur an ngaihtuahsak a ni.
Kashmir-a Muslim te chuan lawmthu sawi nan Kashmir-a social media-ah te Sikh mi te tan a thlawn-a thil tihsak an huam thu an sawi nasa hle a, hotel-a riah man lak loh te, a thlawna inentir leh a thlawna damdawi pek te, a thlawna zirna in-a admission tihsak te, a thlawna thisen pek te thlengin an in huam tih an sawi.
