Nimina Aizawl Civil Hospital ICU-a stroke avanga thi, Minister hlui, Pu Zakhu Hlychho ruang chu vawiin tlai dar 3:30 khan Siaha Vengpuia an chenna in thlenpui a ni a, mi tam takin an lo hmuak. A chenna ina amah thlahna hun hman a nih hnuah Pu Zakhu hi vawiin tlai khan Siaha Vengpuia ECM Kohhran Biak Inah vui a ni a, ECM Kohhran Moderator, Rev. Thylua Hlychho-a’n thlamuanna thuchah a sawi a, Aizawl atanga a ruang zuitute zingah hian Assembly Speaker, Pu Hiphei leh Saiha Bialtu MLA, Dr. K. Beichhua te pawh an tel a ni. Nizana Aizawl atanga Siaha an panna ah, Tawipui North bula lei minin kawng a hnawh pin avangin an tluang vak lova, vawiina Lawngtlai an luhin Lawngtlai khawpuiah mi pawimawh tam takin lo hmuakin a thlahna inkhawm neih a ni a, hemi hnu hian Siaha thlen hmain Zero Point atangin a pianna khua, Maubawk tlawhpui a ni a, Maubawkah hian amah thlahna inkhawm buatsaih a nih bakah Siaha an panna kawng dunga khaw hrang hranga mite pawhin lo hmuakin an thlah a ni. Puan tawh angin Pu Zakhu Hlychho hi Mara fate zinga Cabinet Minister ni hmasa ber a nih bakah, tuna awm tawh lo, Pawih-Lakher Regional Council-a Chief Executive Member hnuhnung ber leh Mara Autonomous District Council-a Chief Executive Member hmasa ber a ni a, Mara Students Organization dintu leh a hun laia zirlai hruaitu pawimawh tak a ni. Pu Zakhu Hlychho hi Siaha Vengpuia an chenna in compound-ah phum a ni dawn a, amah hi Mara fate zinga mi bik leh hruaitu pawimawh a nih avangin Mara Autonomous District Council chuan mi dangte thik loh turin anmahni chenna in compound-ah phum a remti a ni.
