Nimin khan Khuangthing a thlenin mipui tam takin an lo lawm a, mipuite hmaa thusawiin Pu Ramthanmawia chuan mipuite thlan MNF sorkar lo ding ta chuan mi zawng zawng huapin hna a thawk dawn nia sawiin, party awmna a hran vanga inthleibikna a awm dawn lo a ni a ti a, Khuangthing khuaa Anganwadi Center pali te siam\hat nan sum ngaihtuah a nih dawn thu a sawi bawk. Pu Ramthanmawia hian Khuangthing khaw bula Tlawva, Small Hydel Project, kawlphetha megawatt 5 pe chhuak thei tur Nortech Company-in an siam mek chu a hmunah a tlawh a, hnathawktute chuan he Hydel Project hi kumin kumtawpah hawn theih tura peih hman an inbeisei thu MLA chu an hrilh a ni. Pu Ramthanmawia hian nimin vek khan kum 2020-a Champhai Sub Hqrs. YMA Conference Khuangthinga nghah tur chungchang leh inbuatsaih dan tur chungchang Khuangthing Community Hall-ah YMA hruaitute a sawipui bawk a, he Conference thlen tur atan hian amah chu Organizing Committee Chairman a nih avangin an mamawh tur thil chi hrang hrang ngaihtuah dan tur sawiho a ni a, budget atan cheng nuai 20 ruahman a ni.
