Aizawl West I bialtu MLA, Pu K Sangthuama’n a bial chhung, Sairanga tuilian tuartu chhungkaw 238 tanpui nan vawiin khan MLA fund atangin cheng nuai 5 a pe. Hemi puala inkhawm, Sairang Branch YMA Hall-a buatsaihah Pu K Sangthuama chuan, tui lian avanga harsatna tawk zingah nunna chan an awm lo chu lawmawm a tih thu a sawi a, kumina ruahsur nasa avangin Mizoramah mi 10-in nunna an chan tih sawiin, in 240 a chhia tih a sawi a, sorkar pawhin anmahni tanpuina tur a ngaihtuah zel a beisei thu a sawi. Vawiina tanpuina dawngtute hi Sairang VC huam chhunga chhungkaw 120, Sairang Dinthar VC huam chhunga chhungkaw 100 leh Sihhmui VC huam chhunga chhungkaw 18 an ni. Puan tawh thin angin, kumin June ni 13 zana ruah sur nasa tak avang khan Tlawng lui chu nasa takin a lian a, tuilian hian chenna in engemawzat a tichhia a, chhungkaw tam tak, hmun himah suan an nih bakah lawng engemawzat a bo a ni.
