Aizawl West I Bialtu MLA, Pu K Sangthuama chuan kum 10 chhungin Congress-in kawng a siamthat theih loh avangin mipuiin nasa takin an tuar mek niin vawiin khan Phunchawng a tlawhnaah a sawi. Pu K Sangthuama chuan, kawng chhiat avangin zin veivakten nidanga an hun hman aia tam an hman a ngaih phah niin a sawi a, hei hian sum leh tha nasa takin an sen a ngaih phah a, mipui tawrhna a thlen niin a sawi a ni. Pu K. Sangthuama chuan Congress-in ro an rel chhungin lei tum 6 a chim a, hemi avang hian nunna chan an awm hial thu te, tunhnaia Tuirini lei dawh mek a chim avang leh a helna kawng ruahsurin a tih nal bawk avangin hemi kawnga veivakten nasa takin harsatna an tawk tih sawiin heng zawng zawng hi sorkar inthlahdah vanga thleng niin a sawi a ni. Pu K. Sangthuama chuan sorkar sum tam tak hmanga NLUP tanpuina sem pawh hlawhtlinpui sawi tur leh hmuh tur an awm lo niin a sawi bawk. Hetianga sum tun thlenga an la sem hi mipui hmangaihna ni lovin vote zawnna hmanrua mai niin a sawi a ni. Pu K. Sangthuama chuan thalaite zu leh ruihhlo avangin nasa takin an thi niin a sawi a, zu zawrh nghawng a that lo zia MNF-in an hriat avangin kumina Assembly inthlana thuneihna an chan chuan zu zawrh an ti tawp dawn tih a sawi bawk. Pu K sangthuama hi AMC Councillor pahnih Pu H. Zonunsanga leh Pu R. Lalbiakthanga te bakah Block hruaituten an tawiawm a ni.
