AH&Vety Minister, Pu C. Ngunlianchunga chuan vawiin khan Lawngtlai District-a khaw 4, Lower Saikah, Chawntlangpui, Sihtlangpui leh Kawlchaw West te a tlawh. Khaw hrang hrangah te hian amah lo dawngsawngtu mipuite hmaa thu sawiin Congress sorkar chuan thalaite tan khawvel thar siam chho mekin NLUP hmangin mi retheite a dawmkang mek niin a sawi a, kumin kum tawp lama Mizoram Assembly inthlanna neih leh turah Congress Party Pu Lal Thanhawla kaihhruai chu rorel tura mipuiten an thlantlin leh tur niin a sawi a ni. Pu C. Ngunlianchunga chuan he inthlanna neih tura thawhpui nei lova Party mala din tumte chu an chhungkua tunah hian an tal buai mek niin a sawi a, pawl thenkhat thawhho tum mek te pawhin harsatna an tawk mek niin a sawi bawk. Pu C. Ngunlianchunga zin hi Lai Autonomous District Council Chairman, Pu V. Zirsanga leh Deputy Chairman, Pu LR Dingliana Chinzah bakah party hruaituten an tawiawm a ni.
