Prism President, Pu Vanlalruata’n thuneihna an chang a nih chuan thla ruk chhunga Lokayukta din fel a nih tur thu a sawi.
Prism hian kumin kumtawpa Assembly inthlanpui neih tur atana campaign khuh hawnna chu nimin khan \anin, District pathum- Champhai, Serchhip leh Lunglei District-a khaw hrang hrang an fangkual dawn a, nizan khan Champhai District-a North Khawbungah thusawiin PRISM President, Pu Vanlalruata chuan, Pathian leh mipui zara thuneihna an chang a nih chuan thla 6 chhunga Lokayukta din chu Zoram mipuite hnenah an tiam tih a sawi a ni. Pu Vanlalruata chuan, Congress Party hian kum 2008 inthlan dawn khan Vigilance Commission din an lo tiam tawh nia sawiin, hei hi an tihlawhtling lova, hemi hnu hian Sorkar laipuiin Vigilance Commission aia \ha Lokayukta din tura a tih avangin kum 2013-ah chuan Lokayukta din an tiam leh a. Hei hi tihhlawhtlin tum ni awm takin search committee an siam a, chutah chuan amah ngei pawh member a tan ruat niin, an ni hian Selection Committee-ah rawtna an thehluh hnuah chhan awm lovin search committee chu \hiatin a thar din a ni leh nia sawiin, hei vang hian vawiin thlengin Lokayukta chu din a la ni ta lo niin a sawi a. Hei hian Sorkar-in eirukna a huat lohzia leh tihbo a tum lohzia a tilang chiang hle a ni, a ti.
PRISM President chuan, thuneihna an chang a nih chuan eiruk hmangte an hrem ngei ngei dawn tih sawiin, kum 10 chhung rim takin eirukna hi an lo do tawh a. Khatih hun chhung khan thlemna an dawng hnem hle chungin chung zawng zawng chu an do hneh avanga tun dinhmun hi an thleng thei niin a sawi a. PRISM a lo pian hma leh pian hnuah pawh tuna an kal dan anga kal pawl hi a lo ding fo tawh a, kum 2/3 a ral hmain an tawp leh zel a, an tawp hnuah an hruaitute an hausa sawt deuh zel bawk nia sawiin, an ni chu chutiang an ni ve lova, ram siam\hat tak tak an duh avangin thlemna hi an la lo ngam a. Thuneihna an chang a nih pawhin hetiang thil dik lo hi an do chhunzawm zel dawn tih Pu Vanlalruata chuan a sawi.
