Finance Department enkawl Chief Minister, Pu Zoramthanga’n Mizoram Budget a pharh tak chu lanmawi tir tuma a dik lo tih chiang saa siam leh tarlan a ni tih sawiin, hei hi Sorkar pawhin a zahpui a, vawiin thlengin Finance Department website-ah pawh an la tarlang ngam lo niin a sawi. Pu Vanlalruata chuan, Budget-ah hian sorkar hnathawk hlawh te, office enkawlna te, sorkar hnathawk damlo enkawlna tur te leh inrelbawlna te indaih lo tur chiang saa duan a ni, a ti a. Hetianga an tih chhan hi hnathawhna tur tam awm taka lantir tum vang a ni tih sawiin, nakuma budget session neih leh hunah sorkar sum indaih lohna phuhru tura, supplementary demand pharh chu a tam hle dawn a ni, a ti.
Hetiang khawpa chhia leh zahpuiawm, sorkar pawhin a zahpui avanga a tarchhuah ngam loh Budget a awm chung pawha eptu MLA ten Session-a a dik loh thu sawi tur an hre mumal lo chu a zia lo hle tih sawiin, MLA-te chu zau zawka an inzir a pawimawh hle a ni, a ti a. PRISM Party chuan budget awmze nei, ram leh mipuiin hma an sawnpui tak tak tur neih hun an nghakhlel hle a ni, a ti.
