Vawiina Serchhip Bazara vantlang inkhawmah PRISM party Sr. Vice President, Dr. H. Lallungmuana’n Serchhip bialah an President Pu Vanlalruata a ding dawn tih hi a puang chiang ta a, hemi rual hian Serchhip District chhunga bial dang Tuikum-ah Pu RC. Rohmingthanga leh Hrangturzo bilahah Pu RL Liantluanga ding tura ruat an ni tih a puang bawk.
He inkhawm hi Prism Treasurer, Pu HK Liansawta’n a kaihhruai a, Dr. H. Lallungmuana chuan, tuna Mizoram kalphung pangngai chu hmasawn pui theih a ni lo tih mipuiin an hrechiang tawh nia sawiin, kalphung hlui hlawhchham tawh chu hlawhtlinpui tlak kalphung thara thlak ngam a hun tawh tih a sawi.
Serchhip biala ding tura ruat, Pu Vanlalruata chuan, Serchhip bialtu MLA, Chief Minister nilai Pu Lal Thanhawla chu pa ropui tak a ni a, hetihrual hian hnathawh ropui erawh a nei tam lo hle thung niin a sawi a. Mipuiten amah an duh khawp loh \hinna piah lamah tunah chuan a kum a lo tam ta a, amah hmu duhte pawhin a monu an hmuh a ngai ta a ni a ti a, a kaihhruaina hnuaiah Mizoramin hma a sawn chak theih loh avangin amah khing tura Committee-in an ruatna chu a pawm ta tih a sawi.
Prism President chuan, Mizoram siam\ha tur chuan hlawh leh inrelbawlna atana Mizoram budget \anga zaa 90 deuhthaw hman \hin chu tih tlem a, eirukna tihtawp bawk a ngai niin a sawi a, chumi ti tur sorkar chu din turin Prism chuan ke a penchhuak ta tih sawiin, hei hi ram siam\hatna tur kawng awm chhun anih laiin party dang tumahin an aupui ngam lo a ni a ti. Prism-in thuneihna a chang a nih chuan hmasawnna hna tam zawk thawk thei turin sorkar inrelbawlna tizangkhaiin sum tlem thei ang ber hman a ni ang a, eiruk hmangte chu an phu tawk hremna pek vek an ni ang a ti bawk.
Tuikum leh Hrangturzo biala ding tur Pu RC Rohmingthanga leh Pu RL Liantluanga te pawhin thu an sawi a. Candidate puan inkhawm neih zawh hian Serchhip khawpui chhung hmun hrang hrangah Street Campaign an nei chhunzawm nghal a ni.
Hemi hmalam hian ZPM Chief Minister Candidate, Pu Lalduhoma chuan Serchhip biala a din tur thu hi a lo puang tawh a. MNF Ticket-a ding turin he biala \um 3 lo ding tawh Pu C. Lalramzauva ruatfel a ni tawh a. Helai bialtu MLA, Chief Minister nilai, Pu Lal Thanhawla pawh he bial ding nawn leh tura ngaih a nih bawk avangin Serchhip bial hi bial ngaihven ber leh ngaihnawm ber pawl a ni dawn a ni.
