Prism President, Pu Vanlalruata’n mipui huapzo sorkar din a nih theih nan pawl leh mimal, MLA candidate atana it zawng neite chu an hnena rawtna thlen turin a sawm a. Prism hruaitute hian vawiin khan Aizawl Press Club-ah thuthar lakhawmtute kawmin, Mizoram leh hnam siam tha tura kum 10 chuang an lo beih tawhna chuan rah tha tam tak thlen bawk mah se, mipui duh khawp lohna a la nasat avangin ram siam tha tura ngentu ni lova, a siam tha theitu nih an tum ta niin an sawi. Pu Vanlalruata chuan, hmasawnna daltu lian ber chu eirukna nia sawiin, thuneihna an chan chuan Minister leh MLA zingah eirukna a reh theih nan awmze zeia thawh a nih tur thu leh, Minister leh MLA nih chu chakawm loh khawpin an hlawh leh hamthatna dangte chu tihtlem a nih tur thu a sawi a. Kum tin, an thil neih hlut zawng an puangzar ang a, MLA bial tinah Constituency Development Committee dinin, an remruatna hnuaiah MLA Local Area Development Fund pawh pek chhuah a ni ang a, MLA tinin an bial chhungah Office an nei ang a, Sports Association-ah pawh hruaitu an ni thei dawn lo niin a sawi.
Zawhna chhangin Pu Vanlalruata chuan, nakkuma Assembly inthlanpui neih tur atan pawl thenkhat nen inbe tawh thin mah se, MLA bial tina anmahni puala Candidate neih vek chu an thil tum ber a nih thu leh, an Candidate-te pawh zohnahthlak vek an nih tur thu a sawi a. Khaw tina Unit neih chu ram inkaihhruaina tichhetu a nih avangin Unit din an tum loh thu leh tuna khaw hrang hrang Branch 400 vel an neih sa pawh thiah vek a nih tur thu, Prism President chuan a sawi a ni.
