Mizoram Assembly inthlanna tun thla ni 28-a neih tura campaign-a Mizoram tlawha lo zin Prime Minister chuan vawiin khan Lunglei Lunglawn khelmuala an party buatsaih inkhawmah thu sawiin, Congress chuan BJP chu sakhaw pakhat la bing tiin a bei a, sakhaw thila Congress-in BJP a beihna hi thil dik lova mipuite kaihpen tumna niin a sawi a, hetianga thil tih hi BJP tan malsawmna a ni zawk niin a sawi a ni. Pu Modi chuan kum li kalta chhung khan hmarchhak bial \um 27 a tlawh tawh thu te, Mizoram pawh nikum December khan tlawhin Tuirial Hydel Project kawlphetha megawatt 60 pe chhuak thei a hawn thu a sawi a, BJP a sorkar chuan Hydel Project dang siam belh an tum thu a sawi bawk. Pu Modi chuan hmasawnna lama Mizoram mipuite tuihalna ngaihthahah Congress sorkar a puh a, hmarchhak biala State dangten kawng \ha tak tak an neih laiin Mizoram kawng chu a chhe hle niin a sawi a, Congress sorkar kaihhruaina hnuaiah hnathawh dan phung chu a dulin a muang hle nia sawiin, hemi avang hian hmasawnna lamah Mizoram mipuiten an thlen tur an thleng pha lo niin a sawi a ni. Pu Narendra Modi chuan tun hmalama India rama State zawng zawng deuh thawa sorkar \hin Congress party chu tunah chuan nasa takin an tlahniama, State pahnih pathum lekah rorelna an chang ta niin a sawi a, tun hi Mizoram mipui tan Congress party thil tih dan \ha lo hnawla, BJP kaihhruai sorkar siam theihna hun \ha niin a sawi a ni. Tun hmalama hmarchhak bial dinhmun sawiin Pu Narendra Modi chuan hmarchhak State hrang hrangte chu tun hmalam khan bandh, kawng dan pin leh ralthuam cheleka helna hmun a ni \hin a, tun hnai kum li kum nga a\ang khan boruak \ha leh muanawm zawk neiin hmasawnna kawng mipuiten an zawh thei ta niin a sawi a, BJP sorkar chuan remna leh muanna boruak \ha tak hnuaiah hmasawnna neih theih nan hna a thawk a, Mizorama rel kawng siam hna pawhin chak takin hma a sawn niin a sawi a ni. Prime Minister-in thu a sawi hma hian Lunglei District BJP President, Dr. Aichhunga chuan inlawmna thu a sawi a, Lunglei District-a Assembly bial hrang hranga an party candidate, Lunglei East bial atan Pu H. Lalruata, Lunglei West bial atan Pu CS Chawngchhuma, Lunglei South atan Dr. Aichhunga, Thorang bial atan Pu Joseph Lalzawmliana leh West Tuipui bial atan Rina Ranjan Chakma te chu mipuite hmuh turin a dinchhuah tir a ni.
