State thenkhat Chief Minister vawiina a kawmnaah Prime Minister hian coronavirus darh dan azira district hrang hrangte dinhmun thliar hranga a darh zualna hmunah te mipui kharkhipna kalpui chhunzawm dan tur duang turin a ti a, India ram sum dinhmun a tha a, lungngaih chhan tur a awm lo tih Chief Minister 9 a kawmte hnenah hian a sawi a ni.
Prime Minister hian mipui kharkhip chuan nunna tam tak a chhanhim a ni a ti a, Chief Minsiter te hian mipui kharkhip chu May ni 3 hnulamah chuan tih tawp tawh an duh thu an sawi a ni.
Modi-a hian ram sum leh pai dinhmun chu ngaih pawimawh a tul rualin, covid-19 dona kawngah pawh tha thlah lova tanlak chhunzawm zel a ngai tih a sawi a. Mipuiten midang nena inhnaih lova awm, social distancing an ngaihpawimawh chhunzawm zel a tul tih a sawi.
Mimal lirtheite khuahkhirhna hnuaiah an tlan tan theih tawh rin a ni a, hetihrual hian school leh college te erawh khar chhunzawm a la nih hmel a ni. Chief Minister panga te chuan mipui kharkhipna hlih tha an tih thu an sawi laiin, Meghalaya leh Odisha chief minister te chuan chhunzawm rih tha an tih thu an sawi.
