Education Department hotute chuan, MR a zirtirtu lak tur mi 881 te hi Written Exam ngai lovin Interview hmanga lak an ni dawn tih an sawi a, a chhan chu MR rau rauah pawh MR nghet lo, MR Regularisation Scheme-in a huam loh zinga mi an nih dawn vang a ni an ti. Zirtirtu diltute chu Right to Education Act-in a phut angin Diploma in Elementary Education (D.El.Ed) nei emaw, Result nghak mek emaw an nih a ngai a. Hemi piah lamah hian Mizoram sorkar-in zirtirtu ni thei tura Exam a buatsaih Mizoram Teacher Eligibility Test (MTET) paltlang tawh nih a ngai a, tun \um bikah hi chuan MTET nei lo tan pawh dil theih a ni a, amaherawh chu kum 5 chhunga MTET an neih hman a ngai dawn a ni. Primary leh Middle School zirtirtu lak turah hian tun thla ni 30, 31 leh August ni 1-ah te District tinah District Selection Committee-in Interview an buatsaih dawn a, Siaha leh Lawngtlai District chu Autonomous District Council an nih avangin tuna zirtirtu lak tur hian a huam ve lo a ni.
Education Department hotute chuan, zirtirtu lak turah hian a buaipui turin District tinah member 4 awmna District Selection Committee din a ni a, hetah hian District Bawrhsap-te chu Chairman an ni a, District Education Officer chu member Secretary leh District tina Sub Divisional Education Officer Senior ber leh DP&AR aiawh pakhat te chu member an ni a, anni hian thil pawimawh leh \ul dangte an buaipui dawn tih an sawi. MR-a Zirtirtu lak turte hi Primary School zirtirtu 817 leh Middle School zirtirtu 64 an vaiin mi 881 an ni dawn a, hetah hian pianphunga rualbanlote tan zaa 4 hauhsak niin, Primary School bikah chuan pianphunga rualbanlote tan Post 33 dah a ni a, Middle School-ah chuan Post 3 hauhsak a ni.
Aizawl District bikah chuan vawiin thleng khan Primary School zirtirtu diltu General 359 leh PWD Quota 2 leh Middle School zirtirtu diltu General 142 leh PWD quota diltu 3 an awm tawh a ni.
Zirtirtu lak a nih rual hian 4th Grade Post 54 pawh lak a ni dawn a. Heng mite hi chu MR Regularisation Scheme-in a huam dawn avangin Written Exam hmanga lak an ni dawn thung tih Education Dept hotute chuan an sawi a. A hmaa 4th Grade dil thei chin HSLC Pass tih chu sorkar-in pawl 8 Pass chinah a tih hniam tak avangin diltu an sang 5 chuang an awm tawh a ni.
Zawhna chhangin Education Department hotute chuan, zirtirtu bik hi tun hma chuan Contract leh Fixed Pay a lak an neih zeuh zeuh tih loh chu MR-a lak an la neih ngai loh thu an sawi.
