President, Pu Ram Nath Kovind-a’n kum 1986-a Mizoram remna thuthlung siam chu khawvel pum huap pawhin inremna thuthlung siam hlawhtling ber niin a sawi. Vawiina Mizoram Assembly session-a thusawiin President chuan remna thuthlung siam avanga ram pum huapa inremna awm leh innghirnghona tawp chu thil mak a tling niin a sawi a, remna thlen theihna tura mipui, kohhran, hmeichhe pawl leh tlawmngai pawl te \an lakna te, MNF hruaitu, Pu Laldenga thil thlir thuina te, CM, Pu Lal Thanhawla inpekna leh hnathawh te, CM hlui Brig. T. Sailo hnathawhte chu sorkar laipuiin a hre reng niin a sawi. President chuan Mizoram Legislative Assembly-a rorel dan \ha leh mawi chu entawntlak a tih thu a sawi a, kum 45 chhung hetiang tih dan phung mawi tak, Mizoram Assembly-in a nei leh tluang taka ro an rel \hin chu fak tlak a tih thu a sawi bawk. Pu Ram Nath Kovind chuan rorel tura thlante rorelna hmunah chuan thil pawimawh pathum, ngaihdan sawina, duhdan inkalh leh thu tlukna siamte a tel a, amaherawhchu, hetah hian dik tak leh mawi taka thil tih a \ul a, Political Party a danglam avangin buaina a thleng tur a ni lo tih a sawi a ni. President chuan sorkar laipui Act East Policy avangin Mizoram awmna chu hmun pawimawh a ni tih sawiin, Act East Policy hian hmarchhak biala state hrang hrangte inpawh tawnna leh ram chhung hmun dang nena inpawhtawnna bakah Asia chhim chhak ramte nena inpawh tawnna a siam dawn niin a sawi a, hei hi a hlawhtlin hunah chuan Mizoram chuan a thar chhuah hralhna tur market a nei ang a, information technology leh internet lamah te \hang chhovin thil siam chhuahna lamah pawh nasa takin hma a sawn ang a, ziak leh chhiar thiamna leh sap\awng thiamna lama an dinhmun sang chu \halaiten \angkai takin an hmang thei dawn niin a sawi a ni.
President chuan India chu mi chi hrang hrang danglam tak tak chenna hmun, sakhaw hrang hrang biakna, \awng hrang hrang hmanna, hnam nun chi hrang hrang awmna, inchei dan leh ei duh zawng leh ei leh in tur siam dan chi hrang hrang tam tak awmna a ni tih sawiin, hei hian inpumkhatna leh India ram danglamna a siam a, hei hi ngaihlua vawn nun zel a \ul tih a sawi a ni. President chuan mipui aiawha roreltute chu vote hmanga thlan ni mah se, thlan tlin an nih hnuah an bial aiawhtu an ni tawh a, inthlannaa an khingpuite chu an hmelma ni lovin inelnaa an khingpui an ni zawk a, inthlanna zawh hnuah chuan mipuite ham\hatna leh hmasawnna atana an thawhpuite an ni tawh zawk a ni tih a sawi bawk. Mizorama hun tawi te a hman chhunga nuam a tih thu leh, Aizawl khawpui chhunga motor-a a kal laia kawng sira mipuiten an lo lawm dante chu a hriat reng tur thu sawiin, Mizoram tlawha lo zin leh a tum thu a puang a, Mizoram mipuite chu Krismas leh kum thar atan duhsakna a hlan bawk a ni. He Session hi Speaker, Pu Hipheia’n a kaihruai a, President lawmna thu a sawi hnuah Larsap, Lt. Gen. Nirbhay Sharma chu thusawi turin a sawm a, Larsap chuan Mizoram Assembly Session-ah kum 2005, September ni 24 khan khatih laia President, Dr. APJ Abdul Kalam-a’n thu a sawi tih leh President, Pu Ram Nath Kovind chu House-a President thusawitu pahnihna a ni tih a sawi a, Mizoram Assembly chu a din tirh a\anga kum 45 a tlin thlenga roreltute mawi taka an chetna a ni tih te, remna thuthlung kum 1986-a siam chu hlawhtling taka hlen chhuah a nih thu leh Mizoram chu ram ralmuang a nih thu te a sawi a ni. President-in thu a sawi hnu hian Speaker, Pu Hipheia sawm angin CM, Pu Lal Thanhawla chuan President-in Mizoram Assembly-a thu a sawi avangin lawmthu a sawi a ni. He session hian minute 27 chhung a awh a ni.
