Vawiin hi Presbyterian Kohhran hnuaia Kristian Thalai Pawl (KTP) din champha vawi 64-na a ni a. He ni hman dan tur hi Central KTP-in ruahmanna siam lo mah se, Branch hrang hrang chuan an remchan danin an lawm hlawm a. Branch thenkhat chu tukin khawvar hma khan KTP Day pualin an inkhawm a, Biak in leh a chheh vel thianfai leh vantlang hmun thianfaite, damlo leh miharsa hnena tanpui pe pawh Branch engemawzat an awm a ni. KTP Day puala Central KTP Leader, Rev. Zothansanga thuchah chu zanin dar 7:30 hian Hruaina Eng FM Radio-ah tihchhuah a ni ang. Central KTP chuan KTP day hman dan tur hi ruahmanna siam lo mah se, Branch hrang hrangte chu an remchan dana he ni hi hmang turin a hriattir a, Biak In hung chhung hmun remchang laia KTP flag tar tur te, Biak in leh a vel leh Veng chhung hmun pawimawh thianfai tur te, miharsa leh damlo tanpui tur te, thisen pe tur te leh an remchan dana KTP thiltum leh thupui zirho tur te leh member hlate huikhawm zawnga Branch intihhlimna lam hawi programme buatsaih tur te in a hriattir a ni. Kum 2017 KTP rorel inkhawm Report atanga a lan danin, bial 199-a Branch 844 ah KTP member 144,920 an awm a, chung zinga 54,415 chu hmeichhia niin, mipa 90,505 an awm a ni.
