Zuangtuia 132 KV Sub-Station-a Transformer chhia chu Power & Electricity Deptt-in naktukah thlak a tum avangin, naktuk, Inrinni zing dar 9 atanga chawhnu dar 2 thleng, he Sub-Station atang hian Kawlphetha pek chhuah theih a ni dawn lo. Hemi chungchanga Power Department hotuten vawiina hriattirna an chhuahah hei hi tarlan a ni a, hemi avang hian Aizawl khawpui hmar lama veng tam tak – Durtlang leh Sihphir thleng, chhuah lama veng tin deuhthaw leh khawthlang lama veng thenkhat – Tuikual South leh Treasury Square-te telin eng pek theih a ni dawn lova, Mizoram chhim lama Serchhip, Lunglei, Lawngtlai leh Saiha District, khawchhak lama Champhai District leh khawthlang lama Mamit District huam chhunga khuate pawhin eng an nei thei dawn lo a ni. Zuangtui-a 132 KV Sub-Station-a Transformer hi Thawhleh zan khan a kan avangin thlak a ngai a ni. Zonet zawhna chhangin Power & Electricity Department hotute chuan he Sub-Station a lei che avanga Electric hrui thlun thenkhat chat chu siam that zawh a ni tawh a, he Sub-Station dinna lei hi a ngheh loh avang leh a chet thin avangin he mi hmun chhak lam Metre 200 vela hla, lei ngheta Sub-Station thar siam mek chu zawh fel tep a ni tawh a, amaherawhchu he Sub-Station-a bun tur Transformer lian MVA 25 ve ve pahnih lei a ngaih avangin Power & Electricty Department chuan a leina tur sum, NEDP atanga sih chhuah turin a dil mek a, a man hi cheng vaibelchhe 5 vel a tling dawn a, sum hmuh hunah Transformer lian pahnih hi lei a, bun a nih hnuah Sub-Station hlui hi khar a, a tharah insawn a ni ang.
