Kum 2014 ah thingpui dawr hrang hrang kan kuala mipuite titipuiin Chai Pe Charcha Campaign hlawhtling tak a nei a, tunah chuan zirlaite lam Prime Minister Narendra Modi chuan a hawi leh ta. Vawiin khan zirlaite nena inkawmna Pariksha Par charcha New Delhi-a neihah Prime Minister hian ram chhung hmun hrang hrang atanga kalkhawm zirlai sang tel te a titipui. Talkatora Studium-a neih zirlaite nena an inkawmna ah hian Prime Minister chuan vawiin thlengin zirlai a la ni ve reng tih a sawi a, amah lo zirtir tawhtute chuan zirlai nihna thinlung amahah nghet takin an tuhsak a, a la chhawmnung zel tih a sawi. Mahni inrintawkna chungchang zawhna chhangin, Narendra Modi chuan thawklehkhata mahni inrintawk turin damdawi mum ei tur a awm lo a, nitina zir chhoh zel ngai a ni a ti. Zirlaite chu an zirlaipui te el lo tur leh an nu leh pa te pawh an fa te mi fate nena khaikhina nawr chiam chiam ching lo turin a chah a, naupang tinin danglamna an nei theuh a, nu leh pa te tan mahni duh zawng ang ni tura naupang nawr lovin kan faten enge an tih theih zawng leh an thiam zawng tih ngaihtuah zawk tur a ni a ti a, nu leh pa te chu an fate kawmngeih turin a chah a ni. Lok sabha inthlanna hmachhawn tura a inpeih leh peih loh zawhna chhangin Modi hian nakuk-a exam a hmachhawn turah pass leh ngei a inrin thu sawiin, India mi vbc 125 zet te pawhin duhsakna min hlan a ni a ti.
Chanchin Thar PM Narendra Modi-a zirlate hmaah campaign
