PM-in thlawhna te chi campagin nan hmang, eptu pawlin sawisel

Gujarat Assembly inthlan campaign chhunzawm zelah PM, Narendra Modi chuan vawiin khan Ahmedabad bula Sabarmati lui atangin, tuia \um thei thlawhna-in Mehsana bial a pan a, eptu pawlten an sawisel nasa hle. J&K CM hlui, National Conference hruaitu, Omar Abdullah chuan Z-plus ven himna pek te chu khawl pakhat hmang thlawhna-a chuan khap nia sawiin, thlawhna te chi-a PM a chuang chu mak a tih thu leh campaign-na atana a hmang chu dan bawhchhiatna niin a sawi a, Congress thupuangtu Randeep Singh Surjewala pawhin BJP chu ram hmasawnna hrethiam lo leh, dan zah lo-ah a puh bawk a ni. Congress President thar tur, Rahul Gandhi pawhin thlawhna te chi-a Pu Modi-a a chuang chu mi rilru kaih pen tumna nia sawiin, he state-a BJP-in kum 22 ro an rel chhungin, Gujarat mipuite tan chhawr tlak thiltih an nei lo niin a sawi a, Pu Modi-a’n PM hlui, Manmohan Singh-a chungchang a sawi dan chu pawm theih a nih loh thu leh, hnehna an chan ngei an inbeisei thu a sawi a ni. Puan tawh angin Manmohan Singh-a PM a nih lai khan Congress hruaitute leh Pakistan aiawhte chu a rukin an inkawm niin Pu Modi hian a lo sawi tawh a, tun hmaa Mughal lal ram nen Congress hi a khaikhin bakah, Gujarat inthlana BJP hneh dan tur an rel ho nia a hriat thu te a sawi tel a ni. Pu Modi-a’n Congress leh Mughal lal ram a khaikhin chungchangah hian Shiv Sena pawh an lungawi lo hle a, PM-in Gujarat emaw, ram pum emaw hmasawnna tur lam sawi lo-a hetiang zawnga eptu pawlte a bei chu tha an tih loh thu leh mipuite pawhin hetiang avanga Congress chu hnawl an nih thute an sawi a ni.