Nimin tlai dar 4 vel khan Phulpui Field veng-a Pi Lalroluahi, kum 59 mi chu Tank Lorry MZ 01-E 1612 in a su hlum. Kulikawn Police Station atanga ZONET thu dawn danin, Tank Lorry khalhtu hi Lalnunthanga, kum 24, Vairengte Dinthar venga mi a ni a, Phulpuiah hian a thiante tlawh turin a kal a, kawng chhuka a tlan laiin a motor chu a thunun zawh loh avangin he kawnga kal, Pi Lalroluahi hi a su ta a ni. Pi Lalroluahi hi damdawi in panpui a nih laiin a hliam tuar lovin kawng lakah a thi a, a sutu motor khalhtu, Lalnunthanga hi nizan dar 12 vel khan Kulikawn Police station thlenpui a ni a, zu a ruih leh ruih loh endik a nih hnuah zu a in tih finfiah a ni a, Police kutah a la awm a ni. Phulpui khawtlang hruaitute hnen atanga ZONET thu dawn danin, Lalnunthanga hi Phulpui Village Council Vice President, Pu C Lalramchuana te inah hruai a ni a, he thil thleng hria, Phulpui mipui thinrim chu Pu C Lalramchuana te kawtah pung khawmin, Police-te nen engemaw chen an innawr a, Tank Lorry neitu leh a sut hlum, Pi Lalroluahi chhungte an inbiak hnuah Pi Lalroluahi nutapa, ZD Lalthenlova’n mipui pungkhawmte chu thil awm dan hrilhin, tin darh turin a ngen a, nizan dar 11 vel khan an tin darh ta a ni.
