Persons with Disabilities Commissioner atana lak thar, Mizoram University-a Asst. Professor, Dr. Henry Zodinliana chuan a hna a thawk dawn lo nia hriat a ni. Zonet thu dawn danin, tun hnaia PwD Commissioner hna diltu zingah a tling nia ngaih mi pathum chhawp chhuah an ni a, chung zinga mi, Dr. Henry Zodinliana chu tun thla ni 10 khan PwD Commissioner atana ruatna Order tihchhuah a ni a. Tun thla ni 16 ral hmaa a hna a thawh dawn leh dawn loh tichiang tura tih a nih angin a hna thar hi a thawk thei dawn lo tih sorkar a hriattir nia hriat a ni. Puan tawh thin angin, Mizo sorkarin PwD Commissioner atana a rawih nawn, Pi B. Sairengpuii chu Mizo Students Union-in bang tura an phut avangin nikum January ni 22 khan PwD Commissioner atana Pi B. Sairengpuii rawih nawnna order chu sorkar-in a sut a, hemi hnu hian PwD Commissioner hna hi Social Welfare Secretary-in a hmui a ni. PwD Commissioner hi tun hma lamah chuan hriattirna chhuaha ruat fel mai thin a ni a, hei hi fel lova hriat a nih avangin sorkarin Recruitment Rules puitling hmanga lak theih dan tur a ruahman a, hemi hmang hian tun hnai khan PwD Commissioner thar hi lak a ni a, Dr. Henry Zodinliana’n he hna hi a thawh leh theih dawn loh avangin mi dang ruat tum mek nia hriat a ni. Social Welfare Minister, Pu PC Lalthanliana chuan, PWD Commissioner atana ruat thar, Dr. Henry Zodinliana’n a hna a thawk dawn lo nia a lan avang hian he hna thawk tura chhawp chhuah dang pahnih zinga pakhat zawk chu ruat tum mek niin Zonet a hrilh a. Tunah hian lehkha pawimawh tihfel mek a ni a, thil kal lai a nih avangin a hun tur tak a sawi lawk theih rih loh niin a sawi. Pu PC Lalthanliana chuan, PwD Commissioner hna thawk tur hian sorkar-a an hnathawh lai chawlhsan vek a ngaih avangin he hna thawk tur ruat chungchangah harsatna a awm deuh nia a hriat thu a sawi. Dan ang chuan PwD Commissioner hi kum 3 chhung thawh tur a ni a, a tul chuan pawh sei theih a ni.
Mizoram Blind Society chuan PWD Commissioner tur thlan chungchangah sorkar chu thil tifel thuai tura an duh thu an sawi a. Sorkar-in PWD Commissioner atana a chhawp chhuah zingah duh zawk emaw duh loh zawk emaw pawh an nei chuang lo nia sawiin, an ngaih pawimawh ber chu danin a phut anga a tling leh tlak ngei ruat a nih theih nan leh rualbanlote hmangaihtu leh an tana tha taka hna thawk thei tur chu an duh ber a nih thu an sawi.
