Lungawi lohna lantirtute hian kawngpui pawimawh zualte dang pingin, sorkar pisa pawimawhte an hual a, lungin police te an tawng bawk a ni. Hongkong sorkar hian he Dan thar pass anih theihna tur hian hma a la chhunzawm zel a, tun thla ni 20 khian vote hnuhnung ber thlak-a pass tum a ni. Tun \um hi kum tam tak liam hnua police ten \helret silaimu hmanga mipui pungkhawm an beih let lehna hmasa ber a ni a, a tirah chuan lungawi lohna lantirna hi boruak muanawm tak hnuaiah kalpui a ni a, mipui pungkhawm ten sorkar pisa luh chilh an tum avangin police te hian an nawr let a, police ten \helret silaimu leh hmanraw dangte hmanga an beih laiin mipui pungkhawm hian lung leh hmanraw remchang an hmuh ang ang hmangin an vawm let ve bawk a ni.
Police commissioner Stephen Lo Wai-chung chuan mipuite chet dan hi intual vuakna chikhat a ni tih sawiin, pawikhawihtute chu kum 10 thleng lung in tantira hrem theih an ni a ti a, mipui pungkhawm hian kal phal loh chin an pelh luih avangin police te tan beih let mai loh chu kawng dang a awm lo a ni a ti.
Pawikhawiha puhte Hongkong a\anga China-a thawn theihna tur Dan sawiseltute hian China hian pawikhawiha puhte dawp nan mi nghaisak an ching niin an sawi a, Hongkong sorkar erawh chuan mihring dikna leh chanvo human rights vawnghim chunga hmalakna tur a ni an ti thung. Hongkong hi kum 1997 ah China kuta hlan ni mahse, mahni-a ro in rel theihna thuneihna sang tak nei a ni a, tun \uma lungawi lohna lantirna hi kum 1997 hnua a lian ber a la ni.
