Mizoram Pradesh Congress Committee-in sorkara Parliamentary Secretary 7-in CM, Pu Lal Thanhawla hnena nimina banna an thehlut chu nakkuma Assembly inthlanpui lo awm tur atana nasa zawka an inbuatsaih theihna tur niin a sawi a, Parliamentary Secretary 7-te hian hreh hauh lovin banna an thehlut niin a sawi. Assam sorkarin Parliamentary Secretary a ruatna chungchang ngaihtuahtu, Supreme Court-in kumin July ni 26-a thutlukna a siamah Parliamentary Secretary ruatna chu a hnawl avangin heng mite hian puitling takin banna an thehlut niin an sawi a, Mizorama MLA leh Minister-te chu a tul hunah hreh hauh lovin an bang mai thin niin Congress thuchhuah chuan a sawi bawk. Parliamentary Secretary bang ta 7 – Lt. Col. ZS Zuala, Pu KS Thanga, Pu TT Zothansanga, Pu Joseph Lalhimpuia, Pu Hmingdailova Khiangte, Pu K. Lalrinthanga leh Pu H. Zothangliana te hi nimin vek khan MPCC President, Pu Lal Thanhawla chuan an Party General Secretary atan a ruat a, anni bakah hian MLA dang pahnih – Pu Lalrinliana Sailo leh Pu Nihar Kanti Chakma pawh General Secretary atan a ruat bawk a, Gen. Secretary hna an thawh hun chhung tur hi tun sorkar term ding lai tawp hma zawng a ni ang.
