MZP leh NESO member te hian CAB duh lohna thuziak hrang hrang an keng a, CAB 2016 pass chu hmarchhak state-te tan thil hlauhawm tak a ni tih te, India chu a khua leh tuite tan a ni a, dan lova bangladesh a\anga rawn lutte tan a ni lo tih thuziakte an keng a ni.
MZP President Pu Vanlaltana chuan, CAB chu Hindu sakhaw betute duhsakna, Hindu lal ram siamtumna Bill, hmarchhak State mipuite tana him lo, a bikin Mizoram tana him lo zual a nih thu a sawi a, heti chunga Sorkar laipuiin pass tuma hma ala zui zel chu MZP leh NESO chuan an hriatthiam loh thu sawiin, Sorkar laipui chuan a khua leh tui dik takte nge Bangladesh, Pakistan leh Afganishtan-a Hindu te a hmangaih zawk tih chu an zawhna a nih thu a sawi.
Pu Vanlaltana chuan, CAB chu dan lova ram chhunga rawn lut kum 6 awm te khua leh tui pek theih a ni tih a sawi a, Bangladesh nen ramri Km 318-a thui Mizoramin a nei a, ramdang mi an rawn luh theih lohna turin ILP neiin BSF te duty mahse tun thlengin chakma te chu an pung nasa hle tih a sawi a, hemi avang hian CAB chu Mizo te tan a him lo zual a ni ti.
Pu Vanlaltana chuan, Mizo \halai ten India union hnuai a awm an chak hran lo tih a sawi a, Mizo te chu pi leh pu a\anga mahnia ro inrel an nih avangin a sorkar laipuiin a khua leh tuite aia hindu sakhaw bia ram dang mite a duhsak zawk a nih chuan an tih tur an tih ve hun a thleng dawn tih a sawi.
MZP President hian kumin kumtira Lok Sabha in CAB a pass \uma nasa taka duh lohna lantir a nih thu sawi chhuakin, khatih hunlaia Mizoram sorkarin tlawmngawi pawl aiawhte a ngen dan a sawi chhuak leh a, Mizoram sorkar chuan a intiam angin hma a la ta em tih chu an zawhna a nih chu a sawi.
MZP President Pu Vanlaltana hian, Mizo te himna tiderthawng thei chu MZP in a tawp thlengin a dodal dawn tih a sawi a, NESO anga hmalakna pawh a \ul anga chhunzawm zel a ni dawn tih sawiin ram leh hnam himna turin Pathian hnena \awng\aia thlen turin mipuite a sawm a ni.
NESO Finance Secretary Pu Ricky Lalbiakmawia pawhin thusawiin CAB chu Hindu lalram din tumna a ni a ti a, hmarchhak bial chu duh loh paih khawmna hmun atan emaw Sakhaw duhsak bikte dahkhawm nana hman emaw an phal loh thu a sawi a, CAB a hlauhawm loh titute chu an party leh an mahni ham\hatna duhtute an ni a ti. Hemi hnu hian CAB duh lohna memorandum Larsap hnenah an theh lut nghal a ni.
