Kangmei chhuah lai hian Notre Dame hi chei \hat mek a ni a, kangmei hi tualchhung sanaa thawh\anni tlailama chhuak kha a ni a, hnathawkte sawi dan chuan tihpalh thil thua chhuak a nih an rin thu an sawi a, a ban leh khanchhuk te chu kum zabi 12-na ami daih tawh a nih avangin kangmei hi a darh chak phah zual nia an hriat thu an sawi bawk a ni. Kangmei hi darkar 3 leh a chanve vel an beih hnuah \helh mih chauh a ni a, biak in chhip zum leh a chung sang chu a tlu chhe hman a mahse, a rel tlangpui chu chhan hman a ni. Kangmei chhuakah hian thi leh hliam an awm hriat a ni lo a ni.
Macron chuan mipui hmaa thu a sawinaah thil thleng thei chhe ber chu pumpelh a nih tawh thu a sawi a, Notre Dame hi France mipui te nun-a hmun pawimawh tak luah a nih angin biak in hi din a nih leh theihnan hma lak a tiam bawk a ni.
Notre Dame chhungah hian ro hlu tak tak dah a ni a, kangmei \helh tura thawkchhuak mi 400 te chuan ro hlu \henkhat chu an thiar chhuak hman a, heng zingah hian Isua an khenbeh hmaa hling hlukhum an khumtir Holy Crown of Thorns leh kum zabi 13-a France lal Louis-a kawrchung hak \hin te pawh a tel a ni. Macron hian biakin hi a tlawh nghal a, kang \helh hnathawkte chu an huaisenna fakin ram pum aiaawhin lawmthu a hrilh a ni.
Notre Dame Cathedral hi kum 1163-a sak a ni a, Paris khawpui lai taka ding a ni a, khualzinte hmun tlawh nasat ber a ni.
