February ni 26-a India Air Force thlawhna te’n Balakot-a Jaish-e-Mohammed te inkhuarna hmun te an beih hnuah an ram huam chhin boruak-ah ram dang thlawhna te an thlawh tlang Pakistan hian a phal lo a, March ni 27 khan New Delhi, Bangkok leh Kuala Lumpur flight tih loh thlawhna dang zawng tan an hawng leh a, Pakistan sorkar hnuaia thawk pakhat chuan ram venhim chungchanga thuneitute leh Aviation Ministry te an \hutkhawm hnuah May ni 30 thleng India flight te hi an ram chin boruaka an thlawh tlang khap chhunzawm an rel tih a sawi a ni.
Pakistan Science and Technology Minister Fawad Chaudhry chuan India inthlan zawh fel a nih hma chu ram pahnihte inkarah inremna siam theih a rinawm loh avangin he khapna hi chhunzawm a nih thu a sawi a, inthlan zawh hma chu ram pahnite hian an huam chin boruak hman an inkhapsak tawn a rin thu a sawi.
Boruak thlawh tlang hi khap a nih avangin ram pahnihte thlawhna company te’n pawisa an hloh nasa hle a, Pakistan leh India inkar-a rel tlan leh motor kawngpui te hawn vek a nih laia boruaka thlawh tlang khap a ni bik chu an hriat thiam loh chu thlawhna company te hian an sawi.
