Begum hi kum khat chuang chu hrawk cancer vangin a dam lo tawh a, a natna hi nikum August thla khan hriatchhuah a ni a, London-ah in enkawl turin an kal nghal a, vawi eng emaw zat zai a nih bakah Chemotherapy pawh vawi nga vel a la hman a, nikhua hre lo in thla eng emaw chen a awm tawh bawk a, a thih lai hian Nawaz Sharif nena an fa pahnih, Hasan leh Hussain-te chuan an awm pui a, anni pahnih hi an ram court lamin man pumpelh tuma tlanchhia-ah a lo puh tawh avangin Begum-i ruang hi an zui a rinawm lo a ni. A vuina-ah hian Nawaz Sharif leh an fanu, Maryam Nawaz-te chu an kal phal sak an ni thung a, Pakistan Information Minister Fawad Chaudhry chuan ngenna an hmuh tawh thu leh chhuah lailawk phalsak ngei an nih tur thu a sawi tawh a ni. Pakistan PM Imran Khan pawhin Begum-i thi chu a sun thu leh a chhungte a tawrhpui thu a sawi ve bawk a, hmeichhe huaisen leh chak tak a nia a hriat thu a sawi bawk. Nawaz Sharif leh a fanu Maryam-te hian Begum hi an ram inthlanpui neih hma khan an haw san tawh a, an ram an thlen hlim hian an thubuai vangin man nghal an ni. Begum-i ruang hlawm tur hian Nawaz Sharif-a unaupa, Shehbaz Sharif chuan vawiin khan London a pan nghal a ni.
Begum hi kum 2017 September thla khan an ram Supreme Court-in a pasal nihna a hlihsak vangin by-election ah thlan tlin a lo ni tawh a, kumin July thleng khan MP a ni ve hman a ni.
