Pakistan court-in PM hlui, Benazir Bhutto-i thah thubuaiah President hlui, Pervez Musharraf chu ram danga tlanchhia-ah a puang

Pakistan rama anti-terrorism court-in President hlui, Pervez Musharraf chu PM hlui, Benazir Bhutto-i thah thubuaiah ram danga tlanchhia-ah a puang a, a thil neih chhuhsakna tur thupek a siam. He thubuaiah hian court chuan police pahnih chu kum 17 tang turin a ti a, mi dang 5 chu a chhuah bawk a ni. Pervez Musharraf-a hi kum 2007-a Benazir Bhutto-i thah a nihnaah khan mawhphura puhna thubuai, kum 2013-ah khan siamsak a ni a, heta tang hian Dubai-ah a awm ta reng a, tlanbo-ah a puang a ni. Pakistan PM vawi hnih ni tawh, Pi Bhutto-i kha kum 2007 December ni 27 khan Rawalpindi-a vantlang inkhawma thu a sawi zo, a chhuah dawn laiin silai leh bomb hmanga tihhlum a ni a, thubuai siam nghal ni mah se, a ngaihtuah chhung a rei hle a, nimin khan he thubuai hi chin felah ngaih a ni.