Kumina civil mite chawimawina sang, Padma Shri dawng turin Mizoram atangin Pu A. Zakia thlan a ni. Pu A. Zakia hi Siaha District-a Primary School-a zirtirtu hna thawk thin a ni a, Headmaster a nih laiin National Teachers Award pawh lo dawng tawh a ni. Mara tawnga lehkhabu engemawzat lo ziak tawh leh Mara tawng hmasawnna atana Grammar te pawh lo buatsaih tawh a ni. Pu A. Zakia hi kum 1930, October ni 30 khan Serkawr khuaah a piang a, Serkawr khua hi Lakher Pioneer Mission Missionaries, Rev. Reginald Arthur Lorrain thuthmun anih avangin Pu A. Zakia hian zirna lamah pawh hamthatna hmuin kum 1950 khan pawl 6 a pass a, zirtirtua tang zuiin zirna lamah leh kawng hrang hranga mipuite hmasawn nan nasa takin a inhmang thin a ni. ——————
Power & Electricity Deptt. chuan Mizoram chhung hmun 4-ah ni zung chakna hmanga kawlphetha siam chhuahna Solar Plant din turin hma a la mek. ZONET zawhna chhangin P&E Engineer-in-Chief, Pu L. Pachuau chuan Zoram Energy Development Agency (ZEDA) hmangin Tlungvel ramah kawlphetha megawatt 5 siamchhuah theihna tur Solar Plant siam tuma hmalak mek niin a sawi a, hemi atana sum mamawh zawng zawng chu Rs.14,50,00,000/- vel lai a ni dawn a, a bul tan nan NEDP atangin Rs.1,50,00,000/- pek chhuah turin ruahmanna siam a ni a, tunah hian sanction dil mek niin a sawi a, tum khatah kawlphetha megawatt 5 siam chhuak thei khawp siam theih a ni lo ang a, a bul tan nan megawatt 2 siam chhuak thei tura hmalak tum niin a sawi a ni. Champhai District-a Vankal khaw bul ram pharh tha takah ni zung chakna hmangin Solar Park megawatt 20 pe chhuak thei tur din tum niin a sawi a, heta tan hian ram pawh enfel a ni tawh a, sorkar laipuiin Rs.25,00,000/- a pek hmangin DPR siam a ni ang a, Ministry of Power hnuaia inziak lut Consultancy Firm te hmangin DPR hi siam a ni dawn niin a sawi a, he Solar Park hi a din thei tur Company-in a din ang a, chuta tanga kawlphetha a siam chhuah chu Mizoram sorkarin a lei dawn niin a sawi a ni. He Solar Park siam nan hian NEDP atangin Rs.21,00,00,000/- dil a ni a, heta tang hian kumin atan Rs.13,00,00,000/- pek turin sorkar chuan a ruahman mek niin a sawi a, hetihlai hian a dinna tur hmun panna tur kawng siam hna leh Sub Station dinna tur hmun buatsaih hna te chu a theih ang anga thawh tan niin a sawi bawk. Hemi bakah hian Saitual bula Lungpher leh Thenzawlah pawh Solar Power Plant din tuma hmalak a ni a, Thenzawl ami chu Japan International Cooperation Agency sum hmanga din tum a ni a, heta tana DPR buatsaih chu Ministry of Power kaltlangin Japan sorkar pawmpui turin thawn a ni tawh a ni.
