Sorkar laipui, Mizoram sorkar, Tripura sorkar leh Mizoram Bru Displaced People Forum hruaituten tun thla ni 2-a New Delhi-a inremna thuthlung an siam bawhzuiin Kolasib District mi, Tripura Bru Relief Camp paruka awm te laklet dan tur vawiin khan Kolasib Bawrhsap Conference Hall-ah ruahman a ni.
Meeting hi Home Deptt. Joint Secretary, Pi Lalbiaksangi’n a kaihruai a. Hemi hmalama ruahmanna lo siam tawh angin Kolasib District-a chhungkaw 824-a mi 5,143 vel te chu kumin August ni 16 a\anga September ni 30 thlengin Kolasib District-a an awmna tur hmun ruat 10-ah lak kir tum a ni. Bru Relief Camp 6-a Mizoram mi enfiah tawh zawng zawng hi chhungkaw 5,407-a mi 32,876 an ni a, heng mite hi Mamit District-a khaw 48, Kolasib District-a khaw 10 leh Lunglei District-a khaw 4-ah dah an ni dawn a ni. Ruahmanna siam dan chuan heng mite hian Mizoram an lo luh veleh an chen lailawkna hmunah ei leh in tur leh inthiarna bakah an mamawh damdawi lam pek an ni ang a, hemi hnu hian an chenna lailawkna tur in sak sak an ni dawn a ni. Tripura Bru Camp a\anga Mizoram mi hruaikir hna thawk tur hian Liaison Officer leh Adminstrative Officer engemawzat chawlhkar khat rawih an ni ang a, an vote neihna polling station hnai berah dah an ni ang. Kolasib District-a Bru chhungkaw 824 hruaikir tur te hi Kaskau camp ami chhungkaw 30, Khakchangpara camp ami chhungkaw 14, Hamsapara Camp ami chhungkaw 8, Asapara camp ami chhungkaw 391, Naisingpara Camp-a chhungkaw 323 leh Hazacherra camp-a chhungkaw 58 an ni.
