Okinawa-ah US sipai truck leh Japan civil truck insu, mi pakhat thi

Japan chhim lam thliarkar, Okinawa-ah US sipai khalh truck leh truck dang a insu a, Japan mi pakhat a thi. Thuneitute chuan US sipai hi ding rih tura chhinchhiahna, eng sen pawisa lo-in kawng peng \huamah a tlan lui a, civil mi khalh motor hi a su ta niin an sawi a, sipai motor hi ton 2 laia rit a nih thu leh, a sut motor hi a chhe hne hle tih an sawi bawk. Japan rama US Marine Forces hotupa, Lieutenant-General Lawrence Nicholson chuan he thil thleng hi pawi a tih thu a sawi a, Okinawa-a US sipai zawng zawngte tan zu in khap nghal a nih thu a sawi bawk. Media mite chuan US sipai hian zu a ruih avangin traffic chhinchhiahna a hmu lo niin an sawi a ni. Nicholson chuan Japan-a US sipai awm zawng zawngte chu zu in chungchang, mahni inthunun dan leh midang tana hlauhawma khawsak loh dan chungchangte an inzirtir dawn tih a bawk a, hei hi ngai pawimawh turin sipai leh US sorkar hnathawk zawng zawng hriattir an nih thu a sawi. Okinawa Governor, Takeshi Onaga chuan hetiang thil a thleng fo mai chu ngaih thiam har a tih thu a sawi a, nikum lawk khan US sipai pakhat chuan lamlianah zu rui chunga motor khalhin, civil motor pahnih a su a, hemi hma hian US sipai pakhatin hmeichhe pakhat pawngsuala a thah zui avangin, sipaite hi an awmna hmun chhuahsan lo tura tih an lo ni tawh a ni.