Cyclone Fani hian tuipui kam hnaih te hi May ni 3 khan a nuai a. Bhubaneswar ah chuan tun thlengin electric consumer nuai 4 sing 5 zinga a zatve vel chauhin eng an la hmu thei a ni. Police te sawi danin mipui lungawi lo te hian motor kawngpuite dangin Central Electricity Supply Utility office chu luh chhuah an tum a, hnathawktute hi chhung lamah an inkhar khung a ni. Hmun dangah pawh mipui lungawi lo hian chet an thawh nual a, police te chu hmun pawimawh zualah te venhim hna thawk tura tirh chhuah an ni.
Chief Secretary AP Padhi chuan Bhubaneswar ah hian electric consumer zatve vel chu eng pek theih an ni tawh tih Cabinet Secretary PK Sinha nen an inbiaknaah a sawi a, Information and Public Relations Secretary Sanjay Singh chuan Bhubaneswar bikah hian ni hnih khat chhungin eng pek kim vek theih an inbeisei tih a sawi.
Chief Minister Navin Patnaik chuan mipuite harsatna tawh rang zawka chinfel anih theihnan Cyclone in a nuai nat zual district, Puri, Khurda, Cuttack, Jagatsinghpur leh Kendrapara ah te chuan sorkar pisa zawng zawng Inrinni leh Pathianni ah pawh chawl lo turin thupek a ti chhuak a ni. Cyclone Fani avang khan mi 41 an thi a, chenna in nuai 5 leh sang 8 chuang a chhia a ni.
