North Korea vau nan US-in indo thlawhna pahnih Korean peninsula chungah a thlawhtir

United States-in indo thlawhna chak chi pahnih, Korean peninsula chungah a thlawhtir a, hei hi North Korea vau nana a tih nia hriat a ni a, Japan leh South Korea sipaite nena indo nunchan, zan lama an zir zan khatnaah thlawhna hi a thlawhtir a ni. Heng indo thlawhna, B-1B Lancer-te hi Guam-a awm sa a ni a, nizan tlai tawh takah khan Sea of Japan huam chinah a thlawk niin US Pacific Air Force thuchhuah chuan a sawi. Major Patrick Applegate-a chuan, zan lama indo nunchan zira han thlawh kual vel pawh hi US, Japan leh South Korea sipaite nena an thil tih ho mekah thil \angkai tak niin a sawi. South Korea Defence hotute pawhin, heng bomber pahnih hian missile hmanga vansang a\anga khawmual kah theih dan an entir niin a sawi a, South Korea fighter pahnih nen tuipui chungah hian an thlawk a, thlawhna pali hi Korean peninsula chungah thlawk lehin, Yellow Sea tuipui chunga an thlawh hnuah B-IB thlawhna te hi an kir leh niin a sawi. North Korea hian tu thu mah bengkhawn lova ralthuam a en chhin fo avangin heng ramte hian vau deuh \ulin an hria nia ngaih a ni a, thla hmasa khan nuclear ralthuam pawh a en chhin leh a, vawi 6 a en chhin tawh a, heng zawng zawng hi United Nations thuchhuak bawhchhiatna vek a nih avangin US President Donald Trump pawhin sipai chakna hmanga beihah a vau fo tawh a ni. US tuihnuailawng lian, nuclear ralthuam phur, USS Tuscon pawh South Korea ram chhim lama Jinhae lawng chawlh hmunah chhawp reng a ni tih US Pacific Command chuan a sawi a, he lawng lianah hian lawng sipai 150 vel an awm a, helai hmun a chhuahsan hun tur thi hriat a ni lo. Chawlhkar hnih zet kal taah khan US indo thlawhna, F-35B stealth fighter jet leh B-1B pahnih chu Korean peninsula chungah hian thlawhtir a lo ni tawh bawk a ni.