North Korea ramin a missile pahnih, a la en chhin loh chanchin a puangzar palh

North Korea ramin a missile pahnih, a la en chhin loh chanchin a puangzar palh nia hriat a ni a, BBC sawi danin, he missile siamna hmun hi an hruaitu, Kim Jong-un-a’n a tlawh tih chungchang puanzar a nihnaah, puanzar loh tur thlenga tihlan palh nia hriat a ni. Kim Jong Un-a’n Academy of Defence Sciences a tlawh dan leh a thlalak hi KCNA state news agency-in a puangzar a, hetah hian heng missile pahnih – Hwasong-13 leh Pukguksong-3 chungchang sawifiahna te pawh tarlan tel palh a ni a, a lan dan chuan Hwasong-13 hi chhawng thum nei, Inter Continental Ballistic Missile a ni a, Pukguksong-3 chungchang ziahna hi mi pawimawhten an hliah deuh na a, a thlalak atang chuan Submarine Launched Ballistic Missile nia hriat a ni. A hma pawhin North Korea hian a sipai chakna leh ralthuam dinhmun hi a lo tilang palh tawh nia hriat a ni a, mi thiam thenkhat erawh chuan, tihpalh tak tak ni lovin, tihpalh anga lantira khawvel ram dangte mithmuha an dinhmun pho lan nana an tih a ni thei tho tih an sawi. KCNA sawi dan chuan, Kim Jong-un-a hian Academy of Defence Sciences-a scientist te chu rocket thahrui tur leh missile-a vuah tur hmanraw tam zawk siam turin a hrilh a, an thil ruahman dan hi bangah tar vek a ni.