Japan sorkar leh South Korea sipaite chuan North Korea missile kah chhuahin Japan ram a thlawh khum niin an sawi a, missile hi Japan-a Hokkaido thliarkar bula, Pacific tuifinriatah a tla niin Japan sorkar chuan a sawi a, US pawhin he thil hi a thleng ngei tih a nemnghet. US Department of Defence pisapui, Pentagon thupuangtu, Colonol Rob Manning-a sawi danin, North Korea hian missile hi an ram sanaa tukin zing dar 6:30 vel khan a kap chhuak a, missile hian Japan ram a thlawh khum ngei ni a hriat a ni a, amaherawhchu missile hi America khawmualpui tan a hlauhawm pha lo a ni. Japan sipai hotu thukhawm, Joint Chiefs of Staffs chuan missile hi North Korea khawpui, Pyongyang bula Sunan atanga kah chhuah niin, km 2,700 vela a hla, km 563 vela sang a thlawk niin a sawi a, Japan PM, Shinzo Abe-a chuan North Korea chet dan chu demawm a tih thu leh Japan leh chhehvel tana thil hlauhawm tak a nih thu a sawi a ni. North Korea missile-in Japan ram a thlawh khum lohna hi a rei tawh hle ni a hriat a ni a, kum 2009 khan North Korea rocket pakhatin Japan ram a thlawh khum a, he thil thleng avang hian Japan sorkar a thinur hle a, North Korea erawh chuan a rocket hi satellite kahchhuah nan a hmang niin a sawi a, US, South Korea leh Japan sorkar erawh chuan hemi tum hian North Korea hian ICBM a enchhin a nih an ring a ni.
Vawiin khan Russia sorkar chuan North Korea chungchanga buaina avang hian a rilru a hah hle niin a sawi a, Russia sorkar chanchinbu, RIA Novosti sawi danin, Russia deputy Foreign Minister, Sergei Ryabkov-a chuan tuna thil awmdan enin, North Korea chungchanga buaina hian zual lam a pan mek nia an hriat thu leh, tun hnaia South Korea leh US sipaite’n indo nun chan an zir vang khan North Korea-in a chhanlet nan missile hi a kapchhuak a nih an rin thu a sawi bawk. Puan tawh angin, tun thla ni 21 atanga neih tan, US leh South Korea sipaite indo nun chan zir dunna, “Ulchi Freedom Guardian” hi kar hnih chhung awh tura ruahman a ni a, hei hi North Korea sorkar chuan a duh lo hle a, a ram beih tuma an inpuahchahnaah ngaiin, tun hma pawhin a duh lohna lantir nan missile leh ralthuam a enchhin thin a ni.
China chuan Korea ram leh a chhehvela buaina awm mek chuan a vawrtawp a thleng tawh niin a sawi a, he thilah hian US leh South Korea-in mawh a phur tih a sawi bawk. China Foreign Ministry thupuangtu, Hua Chunying-i chuan he buainaa inhnamhnawih zawng zawngte chu inhnukdawk vek tura a ngen bakah, China sorkarin missile enchhin tawh lo tura North Korea a ngenna pawh a sawi ri leh a, buaina hi a rang thei ang bera chinfel a nih loh chuan indona rapthlak tak a chhuah mai a hlauhawm hle niin a sawi a, hetih rual hian muanna leh himna a awm theih nan inbiakna hun a la awm niin a sawi bawk.
