North Korea in nuclear bomb en chhin

North Korea-in nimin khan nuclear bomb chi khat, hydrogen bomb a en chhin a, South Korea Defence Ministry chuan North Korea hian missile en chhin leh a tum nia a hriat thu leh, a en chhin leh turah hian khawmualpui dang kap phak, intercontinental ballistic missile pawh a tel mai thei niin a sawi. North Korea hi khawvel ram hrang hrang bakah, tun hmaa a thlavang lo hauh thintu, Russia leh China ram pawhin na takin a dem a, a thil tih avang hian China hmarchhak bialah Richter scale-a 6.3 vela na-in lir a nghing nia sawi a ni a, North Korea-in bomb a en chhinna hmun, Punggye-ri hmar thlang lam atanga km 400 a hlaa awm, China rama Changchun khawpui pawh a sawi phak nia sawi a ni bawk. North Korea chuan a hydrogen bomb en chhin hi a hlawhtling hle niin a sawi a, South Korea Defence Ministry sawi danin, bomb puah nat zawng hi kiloton 50 vel a ni. He thil thleng avang hian US chuan North Korea hian America ram tana hlauhthawnawm zawnga thil a tih chuan sipai chakna hmanga nuai a hnial loh thu a sawi nghal a, nimin khan US Defence Secretary, James Mattis-a chuan North Korea nuclear bomb en chhin hi kum 1945-a US-in Japan rama Hiroshima khawpuia atom bomb a thlak ai khan a puak na zawk niin a sawi a, US President, Donald Trump-a chuan sipai hotute ko khawm nghalin, Japan PM Shinzo Abe-a pawh phone-in a bia a, President Trump-a hian North Korea chu tun aia nasaa hrek tul a tih thu a sawi nia hriat a ni. China chuan vawiin khan a ram thenawm, North Korea chu demawm a tih thu a sawi a, China foreign ministry thupuangtu, Geng Shuang chuan North Korea hi a thil tih avangin China sorkarin a dem hle niin a sawi a, North Korea hrek belh chungchang erawh chu a sawi lo a ni. Russia Foreign Ministry pawhin North Korea hi na taka demin, nuclear bomb en chhinna hian Korea ram leh a chhehvel chu a tiralmuang lo hle niin a sawi.