North Korea-in missile hmanga Guam kah dan tur ruahman fel tep

North Korea chuan missile pali vela US awp, Pacific tuipuia thliarkar, Guam bul kahna tur ruahmanna chu tun atanga hun rei loteah peih fel a ni dawn tih a sawi. North Korea sorkar media sawi danin, North Korea hruaitu lu, Kim Jong Un-a’n ruahmanna hi a pawm a nih chuan an missile kah chhuah tur, Hwasong-12 chuan Japan ram thlawh kanin Guam atanga km 30 atanga km 40 inkar vela hla, tuifinriatah a tla dawn a, ruahmanna hi tun thla lai hawlah peih fel a ni dawn a ni. Nimin khan North Korea hian missile hmanga US sipai hmunpui awmna, Guam thliarkar kah dan tur a ruahman mek tih puang a, vawiin khan Guam Governor, Eddie Calvo-a chuan North Korea thuchhuah chungchanga a ngaihdan Reuters chanchinbu hrilhin, North Korea hian tunhma pawhin thliarkar bul hnaiah hian missile a lo kap tawh thin niin a sawi a, tunah pawh an thil tum tak an sawi fiah tawh ni a sawiin, North Korea hian US beih emaw indona thlen tir a ngam tak tak lo niin a sawi. Japan chanchinbu, Kyodo tarlan danin, Japan Defence Minister, Itsunori Onodera chuan North Korea missile chu Japan-in a duh chuan a kap thla thei ni a sawiin, Parliament thutkhawmah Minister hian missile hi Japan tana hlauhawm a nih chuan North Korea missile kah thlak phalna a nei thei dawn tih a sawi.