North Korea-in inbiakna neih a remtih theih nan, an thil phutte sut then turin US a ngen tih South Korea President, Moon Jae-In-a’n a sawi. Puan tawh angin South Korea-ah kumin Winter Olympics nghah a ni a, North Korea pawhin infiammi leh palai challang tak tak a tir a, an ram hruaitu, Kim Jong Un-a farnu pawh a hawnna inkhawm-ah a tel ve a, South Korea lam chuan an thenawm ram hi tha taka lo dawngsawngin, inbiakpuia sawmna remchangah an hmang a, US erawh chuan North Korea hian that der a chhuah nia a hriat thu leh, South Korea nena an inkar tihchhiat a tum niin a sawi ve thung a ni. Moon chuan US-in a thil phutte a sut then bakah hian, North Korea pawhin nuclear ralthuam siam chhunzawm loh a intiam ngei chu a ngai tih chu a pawm tho tih, China palai hnena a hrilh bakah, US leh North Korea-te hian dawhkan khat an kil thuai a tul tawh thu te leh hemi kawnga chak taka hnathawk turin China a ngen bawk a, nimin khan North Korea sipai hotu, Kim Yong Chol nen an inkawmna-ah pawh, inbiakna neih puiah a lo sawm tawh a, Kim Yong Chol hian US nena inbiak neih chu an ram pawhin a duh niin a sawi ve bawk a ni. Hemi chungchangah hian North Korea-in inbiakna neih a duh chuan nuclear ralthuam siam a tum tihtawp kawngah hna a thawk phawt tur a ni tih chu an dinna a la ni reng tih White House thuchhuah chuan a sawi a, hemi kawnga North Korea nawr lui tur hian na taka nawr chhunzawm zel an tum thu an sawi bawk a ni.
Chanchin Thar North Korea-in inbiak remtih nan US-in a thil phut sut then se...
