North Korea hrekin awmzia a nei lo- Vladimir Putin

North Korea-in Pathiannia nuclear bomb chi khat, hydrogen bomb a en chhin vanga US sorkarin na zawka hrek a rawtna chu Russia President, Vladimir Putin-a chuan thil awmze nei lo niin a sawi a, North Korea hian a nuclear ralthuam programme chu tihtawp a tum lo hle nia sawiin, sipai chakna leh ralthuam hmanga invauna hian buaina a tipunlun mai mai a, inbiakna hmanga chin fel chu loh chu tih theih dang a awm lo niin a sawi. Brazil, Russia, India, China leh South Africa ram hruaitute thut khawmna, BRICS Summit-ah President Putin-a hian North Korea chet dan chu na taka demin, inchona anga ngaih theih niin a sawi a, tunah hi chuan hrek belh emaw khuahkhirh emaw a sawt tawh lo niin a sawi. Putin-a hian North Korea hrekna chuan a ram mipuite-ah nghawng tha lo tak a nei dawn niin a sawi a, hrek belh tul a tih loh thu a sawi bawk a ni. Puan tawh angin, Pathianni khan North Korea hian hydrogen bomb a en chhin a, South Korea Defence Ministry chuan bomb puah nat zawng hi kiloton 50 vel niin a sawi a, he bomb puak avang hian China hmarchhak bialah Richter scale-a 6.3 vela na-in lir a nghing nia sawi a ni a, North Korea-in bomb a en chhinna hmun, Punggye-ri hmar thlang lam atanga km 400 a hlaa awm, China rama Changchun khawpui pawh a sawi phak nia sawi a ni.