NLUP Kutpui Organizing Committee chu vawiin khan Chief Minister, Pu Lal Thanhawla hovin CM Conference Hall-ah an thukhawm a, NLUP Kutpui neih tur atana inpuahchahna hrang hrang an thlir ho. He thutkhawmna kaihruaitu Chief Minister, Pu Lal Thanhawla chuan, NLUP chu mirethei lamtang programme a nih bakah kawng hrang hranga Mizoram tihhmasawnna programme a nih tel avangin a pawimawh bik niin a sawi a, a buaipuitu Line Department hrang hrang leh a dawngtu hnathawk tha te zarah a hlawhtling mek zel niin a sawi. NLUP chu India rama Gross State Domestic Product (GSDP) tha ber State pali zinga Mizoram a tel theihna chhan pawimawh tak pakhat niin a sawi bawk. NLUP kut hi kumin March thla chawhma lama hman tura ruahman a ni a, a hmun tur ngaihtuah turin sub-committee din a ni a, he Kutpui atana kawng hrang hranga hma latu tur sub-committee 11 din a ni tawh bawk. He sawihonaah hian NLUP Line Department hrang hrangin an inpuahchah dan leh ruahmanna kalpui dan an sawifiah a ni. NLUP kutah hian Line Department 10 in NLUP kaltlanga an hmalakna an phochhuah dawn a, NLUP hlawhtlinpuitute hmalakna phochhuah tum a nih bakah an thlai thar chi hrang hrangte mipui hmuh theih tura phochhuah tum a ni.
