Mizoram Sorkar Flagship Programme, NLUP Kutpui chu March ni 6 atanga ni 9 chhungin Aizawlah hman a ni dawn tih I&PR Minister, Pu Lal Thanzara’n a sawi. Hemi chungchang hi Inrinni tlaia Aijal Club-a thuthar lakhawmtute a kawmnaah a sawi a, he kut hman tur hi March 6-ah Chief Minister, Pu Lal Thanhawla’n Vanapa Hall-ah a hawng dawn a. Kûtah hian line department hrang hrangten an hmalakna an phochhuah bakah, NLUP dawngtu hlawhtling leh entawntlakte thil thar chhuah mipui hmuh theiha pho lan a ni dawn a. NLUP hnuaia thar chhuahte chu bazar aia tlâwma zawrh a nih tur thu Pu Lal Thanzara chuan a sawi a ni. NLUP Implementing Board hotute sawi danin, NLUP hi kum 2011 January ni 14-ah hawn a ni a, hemi kum vek September thlaah sem tan niin, vawiin thlengin chhungkaw 1,30,000 hnenah tanpuina sem a ni tawh a, tunah hian chhungkaw 16,000 hnenah sem leh tum mek a ni. NLUP hawn ni, January 14 chu kum tin Kuthnathawktute Ni atan hman a ni thin a, kumin bikah chuan NLUP Kûtpui hman tum a nih avangin Kuthnathawktute Ni hman a ni lo a ni. NLUP Kûtpui hman a nih chhung hian NLUP hmanga mi hlawhtlingte thlalak pholanna, photo exhibition leh NLUP dawngtu hlawhtlingte chanchin tihchhuah thin tum a ni a; NLUP hian Mizoram pum a tuam chhuak tawh a, a hlawhtlinna hmuh tur tam tak a awm niin NIB hotute chuan an sawi.
