NLUP hlawhchham zia hre chiangtu chu Congress an ni tih MNF Vice President Dr R Lalthangliana’n a sawi. He thu hi vawiina Zawlnuam khuaa Cultural Centre-a SEDP zirhona buatsaihah a sawi a. Dr R Lalthangliana chuan, NLUP hlawhchham chungchang chu CAG pawhin chiang takin a tarlang niin a sawi a, Sorkar chu thiam in chantir tuma hman hlelah puhin, TV lamah tu tu te emaw an interview a, ram puma Project tha ber angin an sawi a, a dawngtu nuai chuang awm zinga hlawhtling anga an sawi te pawh kutzungtang thliah tham lek an ni a ti a, NLUP a hlawhchham tih hrechiangtuten NLUP KUT buatsaih an tum nia sawiin, mipui bum tumna mai niin a sawi bawk. MNF Vice President hian tunhnaia PWD Minister Pu Lal Thanzara’n MNF chu kawng chhia leh lei chim ringawt buaipuia a puhna pawh chhangin Sorkar berin a buaipui that duh loh avangin buaipui lo thei loah sorkarin a siam zawk niin a sawi a, an mahni angin mipui tawrhna an enliam ve thei lo niin a sawi bawk. Dr R Lalthangliana chuan, kumin Assembly inthlana MNF in thuneihna a chan chuan SEDP chuan ram hmasawnna nasa tak a thlen dawn niin a sawi a, mipui tan sorkar chhenfakawm an din dawn niin a sawi. Inkhawm hi Pu T Lalnunsanga’n a kaihruai a ni.
